Կենսագրությունը
ՏԻԳՐԱՆ Գ (ծ.թ.անհտ – մ.թ.ա. 8), Հայոց թագավոր մ.թ.ա. 20-ից: Արտաշեսյան հարստությունից, Արտավազդ Բ-ի որդին: Հաջորդել է ավագ եղբորը՝ Արտաշես Բ-ին: Մ.թ.ա. 34-ին հոր և կրտսեր եղբոր՝ Արտավազդի հետ Անտոնիոսը գերեվարել է Եգիպտոս: Ակտիումի ծովամարտից (մ.թ.ա. 31) հետո Գայոս Օկտավիանոսի (մ.թ.ա. 27-ից՝ Օգոստոս կայսր) կարգադրությամբ տարվել է Հռոմ և դաստիարակվել նրա պալատում:
Գործունեությունը
Տիգրան Գ Հռոմի ձեռքին դարձել է հայկական գահի հավակնորդ՝ ընդդեմ Արտաշես Բ-ի, որը վարում էր հակահռոմեական քաղաքականություն: Արտաշես Բ-ին տապալելու և Տիգրան Գ-ին գահ բարձրացնելու նպատակով մ.թ.ա. 20-ին Օգոստոս Օկտավիանոսը բանակ է ուղարկել Հայաստան: Նույն ժամանակ հռոմեական կողմնորոշում ունեցող ուժերը սպանել են Արտաշես Բ-ին և դիմել Օգոստոս Օկտավիանոսին՝ խնդրելով Տիգրան Գ-ին հռչակել Հայաստանի թագավոր: Գահ բարձրանալով՝ Տիգրան Գ չի դարձել Հռոմի հլու կամակատարը, իսկ մ.թ.ա. 10-ին հրաժարվել է հռոմեական կողմնորոշումից և վարել անկախ քաղաքականություն: Տիգրան Գ-ի վերակողմնորոշման վկայությունն են պարթևական ոճով հատած դրամները, որոնց վրա նա պատկերված է կարճ մորուքով և արևելյան հանդերձանքով:
Այլ հղումները
- «Ո՞վ Ո՞վ է» Հայկական Հանրագիտարան
- Վիքիպեդիա Հանրագիտարան
- Դիոն Կասիոս, Հռոմեական պատմություն, Ե., 1976 (Օտար աղբյուրները Հայաստանի և հայերի մասին 9, Հին հունական աղբյուրներ 1):
- Հրանդ Արմեն, Անկումն Արտաշեսեան հարստութեան, Բեյրութ, 1967:
- Մանանդյան Հ., Քննական տեսություն հայ ժողովրդի պատմության, Երկ., հ., Ե., 1977:
- Մանասերյան Ռ., Հայաստանը Արտավազդից մինչև Տրդատ Մեծ, Ե., 1997:
