Կենսագրությունը
Արա Աբրահամյանը ծնվել է 1975թ.-ի հուլիսի 27-ին՝ Լենինականում ( այժմ Գյումրի ): 8 տարեկանից սկսել է զբաղվել հունա-հռոմեական ըմբշամարտով՝ Գևորգ Հովհաննիսյանի գլխավորությամբ: 1991 թվականին ավարտել է Գյումրիի օլիմպիական հերթափոխի ուսումնարանը: 1994-1998 թվականներին հանդես է եկել երիտասարդական հավաքականում, իսկ հետո Հայաստանի ազգային հավաքականում: 1999թ.-ից սկսել է հանդես գալ Շվեդիայի դրոշի ներքո, 2001 և 2002 թվականներին դարձել աշխարհի չեմպիոն՝ մինչև 76կգ և համապատասխանաբար մինչև 84կգ քաշային կարգերում: 2004 թվականի Աթենքի օլիմպիական խաղերում վաստակել է արծաթե մեդալ: Արա Աբրահամյանը նաև զբաղվել է մարզչական աշխատանքով: Նրա սաներից է եղել Շարուր Վարդանյանը՝ Եվրոպայի 2009թ.-ի չեմպիոնատի մրցանակակիր:
Գործունեությունը
2008թ.-ին Պեկինի օլիմպիական խաղերում՝ կիսաեզրափակչում մրցավարների վիճահարույց որոշմամբ Արա Աբրահամյանը պարտվում է իտալացի ըմբիշ Անդրեա Մինգուցիին: Մրցավարների որոշումը բողոքարկելու փորձը արդյունք չի տալիս և այն մնում է անփոփոխ, ինչից հետո Աբրահամյանը հաղթում է բրոնզե մեդալի համար պայքարում, գալիս պարգևատրման արարողությանը, ստանում մեդալը, իջնում պատվանդանից, նետում այն մրցագորգի վրա և հեռանում: Այդ քայլով նա իր բողոքն է արտահայտել մրցավարների դեմ, որոնք, ըստ նրա՝ անարդարացիորեն կիսաեզրափակչում իրեն չեն թողել պայքարել ոսկե մեդալի համար: Մի շարք ըմբիշներ, այդ թվում նաև Աբրահամյանի բազմամյա հակառակորդները արտահայտվել են ի օգուտ նրա: Թուրք ըմբիշ Նազմի Ավլուջան՝ ով նույն քաշային կարգում ստացել է երկրորդ բրոնզե մեդալը, ասել է. « Այն, ինչ արեցին Աբրահամյանի դեմ, ոչ մի օրինաչափության չի ենթարկվում և ես հասկանում եմ նրան »: Ռուս Ալեքսեյ Միշինը, ով նույնպես հանդես էր գալիս այդ քաշային կարգում, ևս նրա կողքին էր. « Աբրահամյանին բացահայտ դատապարտեցին »: Մեկ այլ ռուս ըմբիշ Հասան Բարոյեվը կարծիք է հայտնել, որ չնայած դատավորների անարդար որոշմանը, Աբրահամյանը չպիտի այդպես վարվեր. « Ինձ համար էլ տհաճ կլիներ, եթե ամեն ինչ այդչափ անամոթաբար տեղի ունենար, բայց, այնուամենայնիվ Աբրահամյանը մեդալով պիտի կանգներ պատվանդանին »: Իսկ Արա Աբրահամյաը ասել է. « Ինձ պետք չէ այս մեդալը: Ես ոսկի էի ուզում »: Պեկինի օլիմպիական խաղերից անմիջապես հետո նա հայտարարել է, որ սա նրա վերջին օլիմպիական խաղերն էին և որ այսքանով ավարտվում է իր կարիերան, սակայն 2012 թվականին՝ 36 տարեկանում կրկին փորձ է անում մասնակցել Լոնդոնում կայանալիք օլիմպիական խաղերին: Որակավորման երկու փուլերում նրան հաջողվում է մի քանի մենամարտ հաղթել, սակայն օլիմպիական խաղերի մասնակցության լիցենզիա ստանալու համար վճռական խաղերում նա զիջում է և չի կարողանում իրավունք վաստակել մասնակցելու իր համար չորրորդ օլիմպիական խաղերին:
Նկարները
Տեսանյութերը
Պեկին 2008 Արա Աբրահամյան-Անդրեա...
Կրետեիլ 2003 Աշխարհի առաջնությու...
Աթենք 2004 Օլիմպիական խաղեր...
Այլ հղումները
