Հայաստանի ժամանակակից արվեստի թանգարանը հիմնադրվել է 1972 թ-ին, Երևանում՝ Հենրիկ Իգիթյանի նախաձեռնությամբ:
Թանգարանի առաջին ցուցանմուշները հայ արվեստագետների նվիրատվություններն էին և 1960-ական թվականների՝ Հայաստանի ու Սփյուռքի նկարիչների գործեր: Հետագայում ցուցանմուշների քանակն ավելացել է ՀՀ մշակույթի նախարարության գեղարվեստական ֆոնդի և ձեռքբերումների շնորհիվ:
Թանգարանում ցուցադրվում են Մինաս Ավետիսյանի, Աշոտ Հովհաննիսյանի, Մարտին Պետրոսյանի, Գայանե Խաչատրյանի, Վրույր Գալստյանի, Վաղարշակ, Հենրի ու Ռոբերտ Էլիբեկյանների, Հարություն Կալենցի, Ռուդոլֆ Խաչատրյանի, Վարուժան Վարդանյանի, Աշոտ Բայանդուրի, սփյուռքահայ նկարիչներ Ժիրայր Օրագյանի, Ժանսեմի, Գառզուի, Ասատուր Պզտիկյանի, Կառլոս Աբովյանի և ուրիշների գործերից: Թանգարանի հավաքածուն համալրվել է միջին ու երիտասարդ սերնդի՝ Սարգիս Համալբաշյանի, Արթուր և Արարատ Սարգսյանների, Մարինե Դիլանյանի, Ալբերտ Հակոբյանի, Սամվել Բաղդասարյանի, Արևիկ Արևշատյանի, Կամո Նիգարյանի, Տիգրան Մատուլյանի, Թենի Վարդանյանի և այլ ճանաչված նկարիչների աշխատանքներով:

Վանաձորի կերպարվեստի թանգարանը (ամբողջական անվանումը՝ «Վանաձորի քաղաքային համայնքի Կառլոս Աբովյանի անվան կերպարվեստի թանգարան») Լոռու մարզի կարևորագույն մշակութային օջախներից է: Ցուցադրության ընդհանուր տարածքը 1500քմ է, այն ներառում է 2000 ցուցանմուշ: Թանգարանը ներկայացնում է և դասական, և ժամանակակից հայ կերպարվեստը: Քանդակը և գրաֆիկան ցուցադրվում են միասին` առաջին հարկում: Վանաձորի նկարիչները ներկայացված են առանձին ցուցասրահով:
2013թվականին Վանաձորի ավագանու որոշմամբ Վանաձորի կերպարվեստի թանգարանը անվանակոչեցին Կառլոս Աբովյանի անունով: Նույն թվականի հոկտեմբերի 30-ին թանգարանում բացվեց Կառլոս Աբովյանի աշխատանքների ցուցահանդեսը` նվիրված գեղանկարչի 75-ամյակին: Ցուցահանդեսին ներկայացված էին թվով 35 կտավներ, որոնց մեծ մասը դիմանկարներ էին:
Ցուցահանդեսին ներկա էին մարզային ու քաղաքային պետական այրեր, մտավորականներ, նկարչի ընկերները և նրա արվեստը գնահատողները:
Այսօր թանգարանում ցուցադրված է Կ. Աբովյանի հինգ աշխատանք: